இணையத்தில் மலையகம் - ப.விஜயகாந்தன்

நாம் இன்று அறிவுப் பொருளாதார யுகத்தில் வாழ்ந்து கொண்டிருக்கின்றோம். வணிகப் பண்டங்களாக்கப்பட்ட அறிவும், தொழில்நுட்பமுமே இன்று உலகை ஆள்கின்றன.

“நம்ம காலத்துல எல்லாத்தையும் மனப்பாடம் பன்னனும். இல்லன்ன மை தொட்டு எழுதி வைக்கனும். இந்த காலத்துல அப்புடியா? எல்லாமே கம்பியூட்டரு தான்.”  இது ஒரு வயோதிபர் நவீன தொழில்நுட்பத்திற்கு வழங்கும் நற்சான்றிதழ். அந்தளவுக்கு இன்று கணிணியும் இணையமும் உலகின் எஜமானன்களாகியுள்ளன. இல்லையென்றால் ஒருவன் இருந்த இடத்திலே அமர்ந்தபடி முன்னூறு கோடி அமெரிக்க டொலர் கப்பம் கோரி உலகை மிரட்ட முடியுமா?

உலகில் இன்று ஒவ்வொரு சமூகமும் தனது இருப்பையும், சக்தியையும், ஆளுமையையும் இணையத்தின் வழி நிரூபித்துக்கொண்டிருக்கின்றன. ஒரு தனித்துவமான இனத்துவ அடையாளங்களைக் கொண்ட சமூகம் என்றவகையில் இலங்கையின் மலையக தமிழச் சமூகம் இணையத்தில் எவ்வாறு உலவுகின்றது? அல்லது எவ்வாறு அடையாளப்படுத்தப்படுகின்றது? அச்சமூகம் இணையத்தை எவ்வாறு அணுகுகின்றது? அல்லது பயன்படுத்துகின்றது? என்பதனை ஆராய்வதாகவே இக்கட்டுரை அமைகின்றது.

இக்கட்டுரை எழுதப்படுகின்ற நாள் வரையான இணையத்தகவல்களை இற்றைப்படுத்தியே (Update) இக்கட்டுரை எழுதப்படுகின்றது. மலையகம், மலையக தமிழர், Malyaham, Malyagam, Malayakam, upcountry, hill country ஆகிய முதன்மைப்பதங்களின் (Key Words) வழி, கூகுல் தேடுதளம் (Google Searching Engine)  காட்டும் பெறுபேறுகளையே இக்கட்டுரை ஆதாரமாகக் கொள்கின்றது.

இணைத்தில் ஒரு சமூகம் சார்ந்து என்ன செய்யலாம்?

மலையக சமூகத்தை பொருத்தமட்டில் சமூகத்தின் ஆளுமைகளும் அரசியல் தலைவர்களும் சமூக செயற்பாட்டாளர்களும் ஏன் கல்வி மான்களும் கூட தனித்தனி தீவுகளாகவும் பற்பல துருவங்களாகவுமே செயற்படுவதனை அவதானிக்க முடிகின்றது.  இதற்கு அவரவர் கொள்கைகளும் கொண்ட கோட்பாடுகளும் வேறுபட்டிருத்தல் காரணமாகலாம். ஆனால் இணையத்தில் வெளிவரும் ஒரு விடயம் அம்பலத்தில் ஆடப்பட்ட கூத்தாக – உலகமே உற்று நோக்கிக் கொண்டிருக்கும் போது ஒரு சமூகமாக, ஓர் இனமாக நாம் ஒன்றிணைந்து எம்மை அடையாளப்படுத்தி உலகிற்கு பறைசாற்ற வேண்டியது நம் ஒவ்வொருவரினது கடப்பாடாகும்.

கல்வி வழிகாட்டல், கல்வி வாய்ப்பு, தொழில்வழிகாட்டல், தொழில்வாய்ப்பு, எண்ணிம ஆவணப்படுத்தல், தரமான பொழுதுபோக்கு, சமூக ஒருங்கிணைப்பு, சர்வதேசத்தைக் கற்றல், ஆய்வு முயற்சிகள், சர்வதேச வாய்ப்புக்களை விஸ்தரித்தல் என மலையக சமூகத்திற்கான தேவைகள் பெருகிக் கொண்டே செல்கின்றன. அதற்கான வாய்ப்புக்களும் இணையத்தில் தாராளமாக அமைந்திருக்கின்றன. நாம் செய்யவேண்டியது மலையக சமூகத்திற்கும் இத்தகைய வாய்ப்புக்களுக்கும் இடையிலான ஒருங்கிணைப்பை இணையத்தின் ஊடாக ஏற்படுத்துவதாகும்.

மலையகத்தை பொறுத்தவரை இணைய வழித் தேடலின் போது மலையக சமூகம் சார்ந்து “மலையகம்” என்ற தொனிப்பொருளில் சோ.ஸ்ரீதரன், திலகர், லெனின் மதிவாணம், இரா. சடகோபன், சரவணன் (நோர்வே), தவமுதல்வன் (இந்தியா), மு.சிவலிங்கம் முதலானோரின் எழுத்தாகங்களே ஜொலிக்கின்றன.

தேர்ந்தெடுக்கப்பட்ட இருபது இணைத்தளங்களின் சுருக்கமான குறிப்புக்கள் கீழ்வரும் அட்டவணையில் சுட்டிக்காட்டப்பட்டுள்ளன.

இணையத்தில் மலையகம் - அட்டவணைகள் 

மேலுள்ள அட்டவணையின் படி மலையகம் சார்ந்து இயங்குகின்ற தெரிவு செய்யப்பட்ட 20 இணையத்தளங்கள் இலங்கை, இந்தியா, நோர்வே, கனடா, இங்கிலாந்து ஆகிய நாடுகளிலிருந்து இயங்குகின்றமையை அவதானிக்க முடிகின்றது. இவற்றுள் தமக்கான சொந்த இணையத்தள முகவரி (Domain Name) மற்றும் இணையத்தகவல்களை சேமித்து வைப்பதற்கான ஒரு இடம் - இணைய புரவல் (Web host) என்பவற்றை வெறுமனே நான்கு தளங்களே கொண்டியங்குகின்றன. ஏனைய பதினாறு தளங்களும் இணையத்தில் இலவசமாகக் கிடைக்கும் Blog, Word press முதலானவற்றின் வார்ப்புருவிலேயே (Templates) இயங்குகின்றன. மேலும் இவற்றில் பத்து தளங்கள் தனிநபர்கள் சார்ந்தும் சில அமைப்புக்களைச் சார்ந்தும் மற்றயவை சமூகம் சார்ந்தும் இயங்குகின்றமையும் அறிய முடிகின்றது. கட்டுரைகள், படைப்பாக்கங்கள், புகைப்படங்கள், இணைப்புக்கள், பணம்திரட்டல், செய்திகள், அறிவிப்புக்கள், ஆவணப்படங்கள், அழைப்பிதழ்கள், காணொளிகள் என்பனவே இத்தளங்களினது உள்ளீடுகளாக அமைந்திருக்கின்றன.

வெகு சில தளங்களை தவிர பெரும்பாலான தளங்களில் தொழில்நுட்ப குறைச்சல்களை தாராளமாக அவதானிக்க முடிகின்றது. அத்தோடு மழையில் முளைத்த காலான்களாக ஏதோ ஒரு சந்தர்ப்பத்தில் ஏதோ ஒரு தேவைக்காக ஆரம்பிக்கப்பட்டவை ஆரம்ப நிலையிலேயே நிற்கின்றன. ஒரு சில தளங்கள் நேர்த்தியாக வடிவமைக்கப்பட்டும் பல தளங்கள் நேர்த்தியற்ற வடிவமைப்புடனும் இற்றைப்படுத்தல்கள் இன்றி இயங்கிக் கொண்டிருக்கின்றன.

மலையக சமூகம் சார்ந்து இயங்குகின்ற தளங்களில் www.namathumalayaham.com முக்கியத்துவம் பெறுகின்றது. நாளாந்தம் இற்றைப்படுத்தப்பட்டு வருகின்றமையும் பலதரப்பட்டவர்களின் ஆக்கங்கள் பிரசுரிக்கப்படுவதும், நேர்த்தியான வடிவமைப்பும் இதன் சிறப்பம்சமாகும். எழுத்தாக்கங்கள், மலையக நாட்காட்டி, ஒளி, ஒலி ஆவணங்கள் என்பவற்றை தன்னகத்தே ஒன்றுதிரட்டி மலையகத்திற்கு ஒரு இணையவழி ஆவணகமாக இத்தளம் செயற்படுகின்றமை குறிப்பிடத்தக்கதாகும்.

malaiagam.com, kumurummalaikal.blogspot.com, puthiyamalaiyakam.blogspot.com முதலான தளங்கள் ஏற்புடையதான வடிவமைப்பினை கொண்டிருக்கின்றன. ஆனால் இவற்றின் உள்ளீடுகள் அதிகரிக்கப்படுவதோடு நாளாந்தம் இற்றைப்படுத்தப்டுமாயின் பயன்படத்தக்கவையாக இவை மாறும்.

மலையகத்திற்கு தனியான இடம் (Menu) ஒதுக்கியுள்ள இணையத்தளங்கள்

01. karudannews.com

02. netrigun.com

03. theevakam.com

04. maatram.org

05. globaltamilnews.net

06. itnnews.lk

07. newsfirst.lk

08. lankasee.com

09. deepamnews.com

10. thinakaran.lk

11. tamilmirror.lk

12. noolaham.org

13. thesamnet.co.uk

14. vaaramanjari.lk

15. thaainews.com

16. tsasouthasia.org

17. ckalaikumar.blogspot.com

18. eelamulakkam.com

19. importmirror.com

20. ibctamil.com.au

21. leftoutvoices.com

22. jaffnafirst.com

23. metromirror.lk

24. jaffnazone.co.uk

25. unmaiolam.wixsite.com

மலையக செய்திகள் / தகவல்கள் இடம்பெறும் பிற இணையத்தளங்கள்

01. bbc.com/tamil

02. ta.wikipedia.org

03. tamil.thehindu.com

04. wikinews.org

05. penniyam.com

06. parwai.blogspot.com

07. opendemocracy.net

08. cpalanka.org

09. yarl.com

10. aavanaham.org

11. nishan1992.blogspot.com

12. sooddram.com

13. sigaram.co

14. athavannews.com

15. dailyceylon.com

16. thuliyam.com

17. live360.lk

18. tamil24x.blogspot.com

19. malayaham.blogspot.com

20. gossip.sooriyanfm.lk

21. hirunews.lk

22. tnnlk.com

23. timetamil.com

24. tamil.adaderana.lk

25. tamil.news.lk

26. virekesari.lk

27. ibctamil.com

குறிப்பு: bbc.com, ta.wikipedia.org, tamil.thehindu.com, aavanaham.org முதலான இணையத்தளங்கள் சர்வதேச மட்டத்தில் பிரபல்யமும் முக்கியத்துவமும் வாய்ந்தனவாகும். எனவே இவற்றை மலையக சமூகம் பயன்மிகுந்த வழியில் உபயோகித்துக்கொள்தல் உசிதமானதாகும்.

முடிவுரை

இக்கட்டுரை சில வரையறைக்குள், கூகுல் தேடுதளத்தின் முதன்மைப் பெறுபேறுகளைக் அடிப்படையாகக் கொண்டே எழுதப்பட்டுள்ளது. இதனை ஒரு முழுமையாகக் கருத முடியாது. தவிர, மலையகம் என்பதை மட்டுமே முதன்மைப் பதமாகக் கொண்டு தேடுதல் இடம்பெற்றுள்ளது. எனவே மலையகம் சார்ந்து இயங்குகின்ற (மலையகம் எனும் பதத்தினை கொண்டிருக்காவிடினும்) அனைத்து இணையத்தளங்களையும் ஒருங்கிணைத்து இவ்வாய்வு மேற்கொள்ளப்படவேண்டும். எடுத்துக்காட்டாக பாடசாலைகள், அமைப்புக்கள், வியாபார நிறுவனங்கள், கல்வி சார் நிறுவனங்கள், பத்திரிகை தளங்கள், பொழுது போக்கு தளங்கள் என உள்நாட்டு மற்றும் சர்வதேச மட்டத்தில் இயங்கும் அனைத்தும் இணையத்தளங்களும் ஆய்வில் உள்ளீர்க்கப்படவேண்டும். இவற்றோடு கூடவே Facebook, Twitter,YouTube முதலான சமூக வலைத்தளங்களும் ஆய்வுக்குட்படுத்தப்பட வேண்டும். ஆர்வளர்கள் இதனை தொடர்ந்து முன்னெடுக்கலாம். அல்லது தமது ஆய்வு பங்களிப்புக்களை வழங்கலாம்.

மலையகத்திலிருந்து தரமான இணையத்தளங்கள் தேவையான அளவு தொடக்கம் பெறாமலிருப்பதற்கு பல்வேறு காரணிகளை இனங்காணலாம். அவற்று உரிய தொழில்நுட்ப அறிவின்மை, கணிணி வசதியின்மை, இணைய வசதி குறைவு, ஆர்வமின்மை, நிதி பற்றாக்குறை, திட்டமிடலின்மை, புதிய திட்டங்களை வகுப்பதிலுள்ள இடர்பாடுகள், பாடசாலை கல்வியில் தகவல் தொடர்பாடல் தொழில்நுட்ப துறைக்கு போதிய முக்கியத்துவமளிக்காமை, ஏனைய சமூகங்களையும் தேசங்களையும் பின்பற்றி பட்டறிவை பெற்றுக்கொள்ளாமை, உரிய துறையில் வளவாளர்கள் குறைவு, பயிற்சிகளுக்கான வாய்ப்பின்மை என்பனவற்றை குறிப்பிடலாம். தமிழ் விக்கிபீடியா, நூலகம், ஆவணகம் முதலான நிறுவங்கள் தற்போது மலையக இளைஞர்களுக்கு இத்துறையில் தொழில்நுட்ப பயிற்சிகளை வழங்க முன்வந்துள்ளமையும் மலையக தொழிற்கலைகளை ஆவணப்படுத்துவதற்கு எடுத்துக்கொண்டுள்ள முயற்சிகளையும் ஓரு நல்ல தொடக்கமாகக் கொண்டு நாம் மலையக சமூகம் சாரந்து தொடர்ந்து இயங்கலாம்.

நம் சமூகத்தை இணையத்தில் அடையாளப்படுத்தும் போது நாம் ஒருமித்து செயற்படுவது மிகவும் இன்றியமையா தேவையுள்ளது. மலையகம் சார்ந்த அனைத்து இணையத்தளங்களும் ஏதோ ஒரு வகையில் மலையகத்தை அடையாளப்படுத்த வேண்டும். அதற்கான பொறிமுறையினை நாம் கண்டறிய வேண்டும். இலங்கையில் மட்டுமின்றி தேசம் கடந்து மலையக சமூகத்தை ஐக்கியப்படுத்தி ஒருங்கிணைக்கும் பணியினை மலையக இணையத்தளங்கள் மேற்கொள்ள வேண்டும். இதற்காக இத்துறையில் விற்பன்னர்களாக விளங்கும் மலையகம் சார் மூளைசாலிகள் முன்வரவேண்டும், பிற சமூகம் சார் தொழில்நுட்ப உதவிகளையும பெற்றுக்கொள்ள வேண்டும்.

எதிர்காலத்தில் உலகின் தகவல் தொடர்பாடல் தொழில்நுட்ப சவால்களை வெற்றிகண்டு முன்னேறும் சமூகமாக மலையகம் மிளிரவேண்டும்.